Eduardo – Nfunno

Eduardo

Nfunno

Vulesse cammenà pè sottoterra

striscianno cumm’ ‘a vverme

int’ ‘o turreno

zucanno ‘o grasso ca scenness’ ‘a coppa

e me facesse chiatto

tunno e forte.

Pò

scennesse cchiú sotto

e me mpizzasse

sotto

sempe cchiú sotto

sotto

nfunno

fino a quanno truvasse

l’ummetore

ca me dicesse:

sotto ce sta ll’acqua.

E quanno ce arrivasse

dint’ a ll’acqua

me ce menasse ‘a rinto cumm’a pesce,

cumm’a pesce cecato

e me magnasse

‘e pesce piccerille ca truvasse

senza manco ‘e verè.

Pò

che facesse?

Roppo

me menasse sempe cchiú sotto

anzino ca sentesse

‘a puzz’ ‘e zurfo

e finalmente ‘o ffuoco!

Me ce menasse ‘a rinto

e me sperdesse

vulanno

e zumpettíanno

ncopp’ ‘e ffiamme

e ce campasse,

gnorsí,

cumm’a diavule!

1974•

Note

nfunno: in fondo; zucanno: succhiando; ‘a coppa: da sopra; chiatto: grasso; tunno: tondo;

mpizzasse: insinuerei; ummetore: umidità; rinto: dentro; cecato: cieco; ‘e verè: vederti;

roppo: dopo; anzino: finché; zurfo: zolfo; zumpettianno: saltellando.